12.3.2009 | 16:09
Orðaleikir I
*Uppfært*
Það er algengt að heyra talað um prósentur eða prósentustig, sérstaklega í tengslum við vexti og vaxtastig. Ég hef í einhvern tíma fylgst með vaxtahækkunum og lækkunum banka, og á víxl glaðst og gramist það. En það er mjög stutt síðan ég áttaði mig á að það er mikill munur á prósentum og prósentustigum.
Prósentur er hlutfall hækkunar eða lækkunar, á meðan prósentustig er staðsetning í prósentuskalanum, frá núll upp í hundrað.
% stig: 1%+1% =2%
% hlutfall: 1%+1%=100%
Hækkun um eitt prósentustig, frá einu prósentustigi í tvö prósentustig, er ekki eitt prósent (1%) hækkun. Talan hækkar um eitt prósentustig í skalanum, en hlutfallsleg hækkun í prósentum er 100%.
Vextir eru gott dæmi þar sem talað er í prósentustigum, þ.e. staðsetningu mælieiningar:
Á Íslandi er 25% yfirdráttarvextir, en í Noregi 5%.
Eru 20% hærri vextir á Íslandi?
Nei, þeir eru staðsettir 20% ofar, en eru hlutfallslega 500% hærri.
Að sama skapi, að færa staðsetningu úr 25% vöxtum í 12,5% er ekki 12,5% prósentulækkun, heldur hlutfallslega 50% lækkun.
Nú skulum við leika okkur smá. Við skulum vera Seðlabankastjóri og við viljum hækka og lækka stýrivexti skelfilega, en þurfum að fegra aðgerðina og glepja almenning með orðagjálfri í leiðinni til að forða mótmælum og pottaglamri.
Stýrivextir hækkaðir um 12,5 prósentustig
Bankastjórn Seðlabanka Íslands hefur ákveðið að hækka stýrivexti um 12,5 prósentustig, úr 12,5% í 25%.
Stýrivextir lækkaðir um 50%
Bankastjórn Seðlabanka Íslands hefur ákveðið að lækka stýrivexti um 50 prósent, úr 25% í 12,5%.
Gott dæmi um rugling með prósentur fann ég á mbl.is í frétt um breytingar stýrivaxta í október.
Stýrivextir hækkaðir um 6 prósentur
Bankastjórn Seðlabanka Íslands hefur ákveðið að hækka stýrivexti um 6 prósentur í 18%. Bankinn lækkaði nýlega vextina um 3,5 prósentur, úr 15,5% í 12%.
Þetta er rangt. Réttara væri að segja:
Stýrivextir hækkaðir um 6 prósentustig
Bankastjórn Seðlabanka Íslands hefur ákveðið að hækka stýrivexti um 6 prósentustig í 18%. Bankinn lækkaði nýlega vextina um 3,5 prósentustig, úr 15,5% í 12%.
En prósentustig gefa ekki rétta mynd af aðgerðinni. Best væri að segja:
Stýrivextir hækkaðir um 50 prósent
Bankastjórn Seðlabanka Íslands hefur ákveðið að hækka stýrivexti um 50 prósent, úr 12% í 18%. Bankinn lækkaði nýlega vextina um liðlega 22 prósent, úr 15,5% í 12%.
Flokkur: Skuldafrelsi | Breytt 13.3.2009 kl. 10:39 | Facebook
Bæta við athugasemd [Innskráning]
Ekki er lengur hægt að skrifa athugasemdir við færsluna, þar sem tímamörk á athugasemdir eru liðin.